Posts Tagged ‘يوم اليمعه’

يوم اليمعة …

14/05/2010

النشّه من صباح الله خير في يوم اليمعة شي عجيب .. وله طعم ثاني .. أحاول أرقد بعد صلاة الفير بس ما شي فايده … آخر شي أقرر أقرا الكهف … وبعدها أضيع وقتي لين ايي وقت الريوق …
طبعاً ما أسوي ريوق حق نفسي شرات ما اتعودت قبل ،،، ولو عُرف السبب بطل العجب …

اتعودنا يوم اليمعه يكون يوم البلاليط … أمي الله يحفظها كانت كل يمعه اتسويلنا بلاليط طبعاً ويا البيض ماله .. بس بعد ما يت هالخدامه نظام اليمعه اتغير .. قمنا ناكل اليمعه “بان كيك” والسبت “بلاليط” ((يحليلها الخدامه مو هي اللي غيرته بس اختي هي اللي خلتها اتغير هالنظام)) … المهم ودلة الشاي حليب شيختهم هاي .. لو الصبح ، الظهر ، العصر ، المغرب ، والعشا ماشي شاي أو شاي حليب فهاذي كارثه عنا .. “نحن قومٌ لا نعيش بلا شاي حليب” ياخ اللي اخترع هالشي أنا أحبه ..

يوم انخلص الريوق … (أنا واللي ناشين) تبدا لحظة الإزعاج ،، اتنطط في البيت وأزعج اللي راقدين عشان ينشون يتسبحون حق صلاة اليمعه …
وبعد الصلاة تبدأ حرب الجرايد العالمية ،، كل حد يتضارب عشان ياخذ ويقرا الجريدة من صغيرنا لكبيرنا ،، والهجوم الأول عالــ “الاتحاد الرياضي” وبعدين ينتقلون بعدها لباقي الفروع … (ترا صغيرنا عمره 10 وكبيرنا الله يطول ف عمره )
بعد الجرايد يتنقل ريموت “الريسيفر أو الدش” لكل الأيادي لين يرحمنا شخص ويحط قناة أو برنامج الكل يرضى يشوفه ،، وغالباً اتكون القنوات الرياضية هي الغالبة ..
وتبدا تنحط سفرة الغدا .. وطبعاً مثل ما البلاليط كان طقس في يوم اليمعة واستوى “البانكيك” بديله ،، عنا طقس ما يتبدل ف يوم اليمعه اللي هو “السمج/السمتش” السمك بالعربي ، إلا في حال ما كان متوفر عنا ..
طبعاً غير هالطقوس ، يوم اليمعة يكون صج يمعة وتقريباً الكل يتيمع عنّا .. لين صلاة العشا وأحيانا للفير .. المهم خليني أروح أكمل باقي طقوس هاليوم .. واحشر الأهل

ويمعه مباركه للكل .. وتقبل الله طاعاتكم =)