مشكلة سحب الرصيد من الآي فون والفاتورة المبالغ فيها

من أول ما عرفت الآي فون كان ودي وخاااااطري اشتريه ولأنه سعره يعني شوي مو قد امكاناتي بما إني ما أشتغل فحشرت أخوي ياخذلي إياه ،، وأخوي وَكّل أخوي الثاني ياخذ لي إياه و وصل الآي فون ،،

فرحتي بآي فوني كانت كبيره ،، لأن الشي يوم يدش خاطرك واتحصله يكون شعورك راااائع ولله الحمد..
طلعاتي من البيت قليله واتصالاتي أقل ، غالباً تواصلي مع الناس يكون بالمسجات بالذات يوم مودي ينقلب واكره اتكلم في التلفون..

بطاقتي واصل والحمدلله انها واصل ،، ومن أخذت الآي فون ما كنت احتاج الرصيد ف شي يعني ما كنت استخدم الرصيد إلا ما ندر. مره وصل رصيدي 15 درهم وحاولت اجري اتصال وقالتلي الإخت: ” عفواً ، ليس لديك الرصيد الكافي ….. ” استغربت عندي ١٥ درهم ومادري جم فلس كيف چي ،، بعد تكرار المحاوله ماشي فايده ،، اتصلت لـ(اتصالات) وقاللي الموظف إنّ الرصيد لو كان أقل من 40 درهم ما أقدر أجري ولا مكالمة ولا أقدر اطرش ولا مسج عصبت عليه واتناقشت وياه وايد، قاللي هذا الشي من اتصالات ومجرد ما يدخل السيم كارد في الآي فون يتفعّل هالشي ،، كرهتهم وسكرت عنه بعد ما شكرته ،، و استفسرت من الناس اللي حواليني اللي عندهم آي فون ،، نصحوني أسوي حركة كلما يكون عندي رصيد ويقولون إن ما عندي.
الحركة إني كل ما احتاج اتصل افتح الـثري جي
وإذا بغيت اتصل مره ثانية اسكر الـثري جي
يعني كل شوي افتح واسكر افتح واسكر
حسب اتصالاتي ومسجاتي،، والحمدلله كل ما ابا اتصل ويقوللي ليس لديك الرصيد الكافي افتحه لو كان مسكر واسكره لو كان مفتوح ونفس الشي لو بغيت اطرش مسجات وعطاني علامة التعجب الحمرا أسوي نفس الطريقة ،،
الطريقة هي :
Settings > General > Network > 3G (off or on)
الإعدادات > عام > الشبكه > ثري جي ( يا تفتحونه يا اتسكرونه)

هذي كانت مشكلتي الأولى ويا الآي فون وانحلت ولله الحمد ،، أما المشكله الثانية فكانت اكبر وسببت لي أرق ،، الله يسلمكم قلتلكم ان طلعاتي نادره من البيت بس آخر فتره كنت أطلع من البيت. مره سرت دبي واكتشف انه رصيدي مخلص واستغربت لأني حسب ذاكرتي المصديه اذكر إن كان عندي رصيد ،، المهم حولتلي اختي رصيد 50 درهم لأني كنت بطرش صورة ضروريه ،، وطبعاً ماروم اطرش الصوره بالبلوتوث لأن الآي فون ما يطرش إلا للآي فون ،، المهم طرشت من هني ويوم ييت أطرش الصوره أكتشف إن رصيدي -3.00 اترييت اترييت قلت يمكن يوصل متأخر ما وصل،، اليوم الثاني چيكت بعد ما وصل واللي عقبه بعد ما وصل ،، اتصلت اتصالات و قاللي مبين عندي إنه وصل قتله والله ما وصل قال خلاص قدموا شكوى وإن شاء الله يردون يتصلون فيكم،، قدمت الطلب وما اتصلوا وطنشت السالفه ، بس اكتشف إني كل ما أطلع من البيت الرصيد يقل ويقل ويقل لين يخلص وعرفت الخمسينه وين سارت واتصلت لاتصالات مره ثانيه قاللي الموظف إن الشبكه مفتوحه من اتصالات وطالما إني موب على الواي فاي بينخصم مني، قتله بس أنا كل شي عندي مسكر الثري جي والواي فاي وكل شي ،، قال حتى لو ، هذا الشي مفتوح من اتصالات وما يتسكر من الآي فون نفسه إلا لو لغيتوا الخدمه بس ما بتقدرون اتطرشون رسايل ام ام اس. طبعاً ماريد ألغي الإم إم إس ،، قلت إلا أحصل حل ،، دورت في النت ودورت ودورت لين يأست ،،، ورديت للحاله القديمه أخواني نصحوني إني أشترك في الباكيج بس أنا مو في حاجته لأن طلعاتي من البيت قليله وما أطلع إلا للضروره .. مره سرت أودي الأهل العياده واترييتهم في السياره وكنت كل شوي اچيك عالرصيد أخاف يخلص وانا مادري واحتاج اتصل فيهم ،، بسبة القلق اللي عشته هالچم ساعه قررت إني إستأنف البحث وما يأست ،، دورت دورت و دورت لييين حصلت الحل 🙂
والله يجزاه خير اللي دور هالحل وكتباه ،، الصراحه ما أذكر أي موقع وأي صفحه واللا چان حطيت المصدر
الحل كان بهالموقع
http://www.unlockit.co.nz/
أول شي لازم تفتحون السفاري وتكتبون الموقع كتابةً موب كوبي بيست ، بعدين بيطلع كلام ومكتوب تحته
continue
تضغطون عليه وبتطلع لستة أشياء بس تختارون
Disable Data (FakeAPN)

بعدين بتطلع صفحة البرنامج ومكتوب
Install
تضغطون عليه وينزل البرنامج وبتحصلونه في
Sittings > General > Profile (Fake APN)
،، في حال بغيتوا اتشيلون البرنامج تدخلون الإعدادات نفس ما موضّح فوق واتسوون له remove

البرنامج بمجرد تنزيله بيشتغل عادي يعني ما يحتاي اتسوون شي ولا اتضبطون شي والإم إم إس بيشتغل عادي بس الشي الوحيد اللي يسويه هالبرنامج إنه يسكر الشبكة يوم تطلعون من البيت ويوم ما اتكونون شابكين عالواي فاي ،، هالمشكله ما يواجهونها بس أصحاب بطاقات الواصل ، حتى أصحاب بطاقات الفاتوره يعانون من قيمة فواتيرهم المبالغ فيها يعني هذا حل لهم بعد، في حال تبون اتشغلون الشبكة خارج المنزل ما عليكم إلا إنكم اتشيلون هالخدمة من الإعدادات نفس ما وضحت قبل شوي،،
والله يجزاه خير الشخص اللي قريت موضوعه ( اللي ما أذكره الصراحه) واللي دلني ع هالبرنامج لأني أنعم حالياً برصيد غير منتهي ورصيدي قام يتم بالأيام والأسابيع وما يخلص 🙂

ملاحظة : بعد الأبديت الجديد للآيفون في خدمة متوفرة في الإعدادات إسمها
Cellular Data
إذا عندكم هالشي في إعداداتكم ما يحتاي اتنزلون هالبرنامج مجرد انكم اتخلونه مسكر يعني انتو مسكرين الشبكة واذا بغيتوا تفتحون الشبكه افتحو هالخدمة وبس وبچذي بتنعمون برصيد آمن وفاتورة آمنه بعد 🙂

الأوسمة:

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s


%d مدونون معجبون بهذه: